BIDEGURUTZEA

Bidegurutze batean aurkitu nintzan deabruarekin,
eta zein bide hartu behar nuen pentsatzean
zapatak ostu zizkidan.
Harreskerostik bizi naiz infernuan,
bidegabe bideak eraikitzen,
oinutsik,ametsetan,eraikitako bideak ibiltzen.

Deabruaren Pastorala

Erraietako deabru,
larreko ehiztari,
abere-herriko zaindari,
saroben izkutatu
zeruan ageri.
Larre barri,larre barri,
oihuka Tipuloi,
txatxoak amagoian erratza
igitzen,igitzen,
herriko bazterrak garbitzen.
Sorginak lapikoan
suari putz egiten,
bihotz hoztuak,
mamuen batzarrak.
Egurre,egurre,egurre,
akelarrea,
egurre,egurre,egurre,
lapikoazpian,
ekoiztu,ekoiztu,ekoiztu,
sozialismoa.
Larre barri,larre barri,
oihuka Tipuloi,
herria esnaute,
ahariak erne!
Akerbeltzak aitz-herrian
arbasoen mintzo,
herri gerra-herri gerra,
matxinatu berriro.
Egurre,egurre,egurre,
akelarrea,
egurre,egurre,egurre,
lapikoazpian,
ekoiztu,ekoiztu,ekoiztu,
soberania.

EROKERIA

Behin erokeria indixu baten arima bahitu zuen,
eta indixua preokupauta lapikora jaitsi eta deabruari
galdetu zion erokeria nola aurkitu.
Deabruak konta zion bakarrik zaldi basati bat
aurkitu zezakela erokeria eta indixua zaldi basati bat aukeratu
eta haize ekaitz baten erdian abiatu zen erokeriaren atzetik.
Behin erokeria aurkitu,bahitu eta arima askatu aurretik
ipui bat kontatzera behartu zion,eta hau konta zion
nola aintzina deabrua eta santu bat amalurraz maitemindu
eta borrokan hasi ziren,eta liskarra aprobetxatuz handik
pasa zen tximino bat deabruari ingenioa eta santuari itxaropena
ostu zizkiela,eta hola jaio zala gizakia.
Eta indixua sinistu barik tximino bat bezala
barre egiten itzuli zen bere herrira.

AMAGOIAN ERRATZA

Txatxoak igi dezala Amagoian erratza,
bideko zikinak baztertzen dituna.
ahariak gida dazala herria,
akerbeltzak egurra biltzen duten bitartean.
arranoa gorde dazala geure soberania,
bihotzaren larreko akelarrean.

EKIAZPIKO DEABRUAK

Ekiazpiko deabruak dauz kanpetan
beran zabalera giza-larretik
kapitalismoak gizadia suntsitseko asmoari
sua emoteko beharrez,
eta guk,gizakiak,
izateko biharrez,
deabruekin bat egin dogu
herri-gerra delakoaren nahitanahiez.

AZTARNAK

Aztarnak eraiki dituzten
sortzaileak,
arraigoaren transhumanteak,
ortzipeko deabruak,
erlijiobariko gizakiak,
soberanian bakarrik
sinisten duten
amalurraren semeak.

BIHOTZAREN AKELARREA

Gaur gauean
geratuko gara,
zu ta ni,
deabruaren larrean,
oinutsik,
bihotzaren akelarrean,
amalurran betirako
guk biok ernaitzeko.